日本5天自由行(7) 第五日 ~ 黑門市場

最後一日係日本嘞  去黑門市場買生果 

太早未開哂檔  食完個早餐就差唔多開哂檔嘞 

檸檬茶就只得一片檸檬 

有即燒海鮮呀!  回想番都後悔冇食燒大蝦囉  真係好大隻架 

註明"可買回香港" 

mami 同芊芊都鍾意食草餅   好彩係哩度點都買咗盒草餅返香港比芊芊食  唔係嘅話  就真係黎到日本咁新鮮都冇食過一嚿冇買返香港囉

最後mami買咗箱富有柿1150 yen   同一箱崗山晴王提子11000 yen

仲買咗兩棵京蔥 

之後行咗去橫街  又有好多野睇  可惜冇時間又冇手囉  跟住係哩間好地道嘅麵店食午餐 

全個旅程直到今日先醒起要買罐可樂比婆婆囉  好彩都買到

戰利品  哩個係比姨婆個幾隻寶貝既  mami一見到就覺得好攪笑  又得意 

芊芊order mami要買嘅日本柑 

百貨公司買嘅朱古力  好抵下喎 

明明預夠時間係機場食埋野先上機既  點知去到排隊check-in同安檢咗好耐  攪到有冇時間買野  又冇時間食野  連廁所都冇去到就要上機喇  真係吖!  另外原來廉航除咗寄倉行理  上機只準帶兩件行理囉  check-in先知  好輪盡呀!

冇時間都要去搵薯條三兄弟買囉  可惜唔見有  點都執兩盒野黎買

係機上Aunty Angela買咗支水  25蚊鬼咁細支  要記低支水喎

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

而今日兩隻豬豬同dada一齊  就爭野喊嘞  個dada就whatsapp悔氣說話比mami聽囉



返到屋企樓下要dada落樓幫手攞行理  mami一個真係攞唔到上樓囉
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

安全完成旅程  自由行  係多咗shoping既次數  不過景點就少   而每次亦都係唔夠時間shop既  亦好彩mami冇聽Aunty Angela意見  話最尾個兩日先shopping咋  唔係跟本買唔切野  同一日內點攞到咁多野  而係機場更加係買唔到野  所以mami一見啱就買架喇

自由行預咗行到腳仔軟  mami好彩準備好哂野  對豬腳都接受得到今次既旅程

旅行5日  除咗5日全屋嘅衫都未洗之外  仲連出發前洗乾淨嘅衫都未收囉  真係吖!

另外棵小白菜亦都冇人淋水  謝哂  好彩之後淋番幾日  就生番咋

第二朝起身返學  芊行見到mami又冇特別話好掛住mami喎  即係其實真係冇mami都得架喇

祈待下一次嘅旅行!